У Брэсце новы асфальт на цэнтральнай аўтамагістралі горада пайшоў аварыйнымі ямамі. Таксама яго вырубаюць дзеля новага вадавода. Гэтыя дзівосы адбываюцца на вуліцы Маскоўскай, на адрэзку ад скрыжавання з Піянерскай да Кобрынскага моста. Пра латкі на новым асфальце на адрэзку ад “Кароны” да скрыжавання з Піянерскай TOMIN.BY ужо паведамляў.
Цяпер праз зусім кароткі час, нейкі тыдзень, нядбайнасць ямамі і купінамі пачала вылазіць з боку Кобрынскага моста.
Адразу за з’ездам з вуліцы Піянерскай у бок моста на крайняй правай паласе кіроўцы аб’язджаюць люк ліўнёўкі.
Збоку ад яго пасярэдзіне паласы прасела зямля, і асфальт апусціўся, утварыўшы круглую яму. Пасля дажджу вада нацякае ў яе і ў гіганцкую 30-метровую прасадку з правага боку паласы пры бардзюры. Сцекчы вада не можа – так пакладзены асфальт.
Відавочна, што пакрыццё тут хутка будзе разбітае мікрагідраўдарамі ад кантакту колаў транспарту і стаячай вады. Дарэчы, такі лёс напаткаў і многія бетонныя асвятляльныя слупы, насупраць якіх на дарозе збіраецца вада. Прыглядзіцеся ўважліва – на такіх слупах бетон знізу вымыты, і ўвесь гэты цяжар трымаецца выключна на голай арматуры.
На гэтым сама ўчастку пасля ўкладкі асфальту распачалі рэмонт вадаводаў. Аварыйны вузел, які часта раскопвалі раней, месціцца насупраць офіса “Беларусбанка” з боку электрамеханічнага завода.
Пакуль што ў трох месцах парушылі новы асфальт на тратуарах: раскапалі канавы з боку новых будынкаў Кіеўкі.
Перад прыпынкам “Зялёная” аўто на адрамантаванай правай крайняй паласе прымаюць улева. Тут утварылася купіна вышынёй каля 5 см, а перад светлафорам абазначылася ладная каляіна. Перад скрыжаваннем з вуліцай Сікорскага асфальт няроўны, і вада стаіць справа пры бардзюры.
Нагадаем, на сёння ў Рэспубліцы Беларусь аварыйнымі лічацца паглыбленні ў пакрыцці дарог не менш за 5 сантыметраў.
Гэта вышыня запалкавай каробкі. Гэта значыць, што пры аварыі вы можаце звяртацца ў суд і разлічваць на задавальненне іску.